पीडिता ३७ वर्षीय महिला बाणेर येथे वास्तव्यास आहे. त्या हिंजवडीमधील नामांकित कंपनीत संगणक अभियंता म्हणून कार्यरत आहेत. शुक्रवारी दुपारी साडेबाराच्या सुमारास चालक तुषार लांडगे त्यांना घेण्यासाठी गेला. प्रवासादरम्यान महिलेने कारमध्ये जेवणाचा डबा उघडला आणि त्या खात बसल्या. तुषारने त्या महिलेला कारमध्ये डबा खाण्यापासून रोखले. यावरून दोघांमध्ये शाब्दिक भांडण झाले. यानंतर तुषारने आरशातून वाईट नजरेने पाहिले. तसेच अश्लिल इशारेही केले, असे महिलेचे म्हणणे आहे.

हिंजवडी वाकड पुलाखाली गाडी आल्यानंतर तुषारने त्या महिलेला कारमधून उतरु दिले नाही. त्याने कार बंद केली आणि आता तुझी काय अवस्था करतो? अशी धमकीदेखील दिली, असा आरोप त्या महिलेने केला आहे. शेवटी कारमधून बाहेर पडल्यावर महिलेने थेट पोलीस ठाणे गाठले आणि तुषारविरोधात तक्रार दिली. पोलिसांनी आरोपी तुषारला अटक केली आहे.